العنوان غريب مش كده؟ ... معلش ... عموما لو لاقيتوا أى حاجة غريبة تانية فى التدوينة دى عدوهالى المرة دى علشان أنا دلوقتى سهران بأذاكر بعد عنكو وعن السامعين ... أصلى عندى امتحانات الأسبوع بعد الجاى إن شاء الله... والإمتحانات دى هى موضوع التدوينة دى ... ناخد نفس ونقطة ومن أول السطر.
الموضوع وما فيه إنى مش عاجبنى فكرة إن علشان الواحد يحضّر ماجيستير لازم يقعد سنة يدرس مواد متقدمة عن المواد المدرّسة فى فترة الكلية ثم يمتحن فى هذه المواد التى ذاكرها وإن نجح يستطيع إعداد الرسالة ثم مناقشتها وإن لم ينجح –لا سمح الله- لا يستطيع تحضير الرسالة ولا يحزنون!!
أنا مش عارف النظام ده موجود فى الدول العربية ولا لأ ... حتى ماأعرفش إذا كان موجود فى كل الجامعات المصرية ولا لأ ... بس أكيد هو فى أغلب الجامعات المصرية ... الفكرة ليه ندرس تانى فى مواد سواء جديدة أو امتداد لمواد الكلية فى فترة قبل التخرج ... ليه آخد من عمرى سنة تانى فى دراسة طالما ان الهدف هو تحضير رسالة ماجيستير وليس الإستزادة غير المشروطة من العلم وبالتالى مالوش معنى إن أنا أقعد أدرس فى مواد عارف ومتأكد كويس أوى إن أنا مش هاأستخدمها فى الرسالة بتاعتى وبالتالى دى تكون أحسن طريقة لتضييع الوقت ... وماحدش يقوللى أدى إنت بتتعلم برده وبتستفاد ... أقوله العلم متاح فى جميع المجالات والعلم لا ينتهى ... فلو فتحت لنفسى المجال إن أنا أقعد أتعلم العلم المفيد فى كل المجالات بدون تحديد هاألاقى نفسى فى الآخر مثقف جدا ولكن غير متخصص فى مجال ... وطبعا أنا مش محتاج إن أنا أقول إن إحنا فى زمن تخصص ماينفعش فيه حكاية أخينا المثقف الغير متخصص ده!!
واحد يسألنى ويقوللى ... طيب تقترح ايه حضرتك ياسعادة المعترض ولا إحنا فالحين فى الكلام والإعتراض وخلاص؟
وهنا أرد عليه وأقوله ... أنا شايف إن الموضوع يمشى كالتالى:
أنا مثلا عايز أحضر الرسالة فى موضوع س مثلا –لو مش عاجبك س خليه ص مش هانختلف- يبقى أروح للدكتور وأقول له أنا عايز أحضر معاك فى الموضوع س ... فيطلب منى إن أنا أعمل بحث مبدئى عن الخطوط العريضة للرسالة ثم نجتمع مرة أخرى ... فى هذا الإجتماع الثانى يحدد الدكتور لى المواد التى سوف أحتاجها فى موضوع رسالتى ... وأروح أنا طوالى أحضر المواد دى وامتحنها من غير ما أنبت ببنت شفة –حلوة بنت شفة دى- وبعد كده أحضر الرسالة ... كده هانوفر الوقت اللى كان هايضيع فى دراسة المواد التى لا تمت بصلة بموضوع رسالتى ... وكده نكون ركزنا على الهدف وحققنا أحسن فاعلية للوقت.
وهنا يرد عليا نفس الشخص اللى سألنى السؤال الأولانى –واضح انه مستقصدنى- ويقولى ... طيب ياخويا اقتراح شغال بس فيه مشكلتين:
أولا: المشكلة إن بعض الناس ممكن تكون غير جادة فى موضوع نيتهم لتحضير الرسالة وبالتالى هايضيعوا وقت الدكتور فى الأول ويسيبوه بعد كده بينما الحل الأولانى اللى متطبق حاليا بيمنع ده لأن الطلبة اللى مش آخدين الموضوع بجد هايزهقوا ويسيبوا التمهيدى بعد فترة وبالتالى نكون صفينا الناس وخلينا الناس الجادة بس.
ثانيا: هانجيب لحاضرتك منين دكاترة للمواد الكتير اللى انت عايزها تتدرس وتكون فى الوقت اللى هايبدأ فى الواحد تحضير رسالته فيه؟
وأبدأ أنا بأه أجاوب:
أولا: مشكلة الجدية دى ممكن تتعالج بحاجتين يتطبقوا فى نفس الوقت
الحاجة الأولى إن الدكتور لما يهل عليه الناس اللى عايزين يحضروا رسالة يطلب منهم واجب تقيل فى الأول ولكن –وخللى بالك من لكن دى علشان الللى جاى مهم- يكون الواجب ده فى صميم موضوع رسالته ويفيد برده فى تحديد المواد اللى هايدرسها الطالب وبالتالى نكون ضربنا عصفورين بحجر ... فلترنا الناس بالواجب التقيل اللى مركز على الهدف من الماجيستير وفى نفس الوقت حددنا المواد اللى الطالب هايحتاج يدرسها.
الحاجة التانية هو إن الطالب بالفعل هايدرس مواد ويمتحن فيها وبالتالى هو هايتطبق عليه نفس النظام الأولانى بس زى ماقولت مابيدرسشى مواد وخلاص ولكن بيدرس مواد فى صلب اهتمامه وفى صلب موضوع رسالته.
ثانيا: موضوع انشغال الدكاترة مش هايبقى ملحوظ قوى لانه هايفرق بس فى الأول فى استقبال الدكاترة لكل الطلبة قبل الفلترة وزى ماقولنا هاتبقى مرتين بس ... مرة لعرض الطالب فكرة الرسالة على الدكتور والتانية لتحديد المواد اللى هايدرسها الطالب ثم تكون زيارات متقطعة للدكتور مع الطالب لمتابعة تقدم الرسالة ببطء ... ولحل مشكلة ضبط مواعيد المحاضرات يمكن تحديد ميعاد عرض الرسائل على الدكاترة قبل بداية الفصل الدراسى لتنظيم مواعيد المحاضرات وتكون مناسبة لجميع طلبة الماجيستير.
ده كان اقتراحى لموضوع التمهيدى ده ... يمكن أكون صح ويمكن أكون غلط ... بس أكيد فى طريقة أفضل من التمهيدى ده علشان نحضر رسالة الماجيستير.
أخوكم المزنوق فى المذاكرة وربنا يستر عليه ... واحد من المسلمين
سلام عليكم
هناك ٦ تعليقات:
H basha .... after el ta7eya wal salam, what I know is doing the Masters is not just about a thesis, I know this sounds weird, bas it is not. However, Masters is about giving you the ability to do a full, detailed,in depth research, and analyzing the data you gathered and draw conclusion from it, that is the the skills you should have after the Masters. The story behind the advanced topics we take while doing the Masters is different however, because it's bad for you and good for you at the same time???!!!! I know this should sound more than weird, maybe I just went he-wired after some days of studying, bas 7'aleena nemshy wara el kesa la3'yet el a7'er ya rayes, emsek ba2a el rassa di:
1- it should establish common knowledge base that most academic researchers in the field are familiar with.
2- however , not all the subject we take is as necessary as one might think like for instance math which I know you must be studying now, and it's driving you to write this on that topic :).
3- Those courses should, and I do not say that they are, designed to upscale your level of comprehension from a normal BSc holder to a full researcher, mel a7'er lazem yet3melek upgrade fi mostawa el tafkeer.
4 – Professors that give you these courses should, and I don't say that they all do that, make you aware of the thinking methodology in their specialty field, and if possible drive you to think about currently issues faced in the field.
Tayeb, gameel awy el ana ba2oloh da, bas 7'od 3andak el kam so2al dol (el zaher eny hatala3 fil el a7'er el sha7'as el re7'em beta3 el as2ela). why does the faculty give us unnecessary subjects ?? Leeeeeeeeeiiiiiihhhh ya 3aaalllllaaaam? el sabab el asly nabil fil tafkeer walaken da3eef fil tatbee2, 7ad fahem meny 7aga.... ma3takedesh, rakez ma3aya, fi 7aga esmaha Helper Subjects, those are the subjects that should support your comprehension for other core subjects, hah weselt keda? Ma3takedesh, ta3ala adeek mesal, The numerical analysis is helper course for instance, numerical analysis is commonly used in two fields that I know of, Geophysics (wade7 mel esem enoh e7'tera3 mesh taba3 el handsa aslan) and Random Signals handling in RF field I.e. noise wel 7agat di, tayeb e7na mabna7'odesh RF aslan wala yehemena fi she2, leih beta7'od el course dah tayeb? 3aref leih? 7'od 3andak el egaba el 3abkareya di, 3ashan esmak fil a7'er mohandes etsalat, mesh mohem anhy ta7'asos , mesh mohem enak mesh hatesta3melo, el mohem enoh mohandes el etsalat lazem 7ataman wala bod enoh ya7'od el beta3 da, la2onoh course moshtarak 3ala kol mahndessen el etsalat. A3taked keda weselt, bas da mesh a7'er el kalam, fi coursat tanya -zy el math- fe3lan betfeedak fi subjects o7'ra – zy el probability 3ashan el queueing wel linear algebra 3ashan el high-level synthesis sechudling- bas el mo2kad fil mawdoo3 enak mesh hatstafeed bekol el content beta3 el helper course, wa leza , ana baktare7 en el helper courses ye7sal integration mabenaha wel el coursat ely bet7tagaha, maslan lama Professor yeshra7 7eta me7taga probability, yeshra7 el 7eta ely me7tagaha bas ma3 el mawdoo3, we yob2a keda mafeesh 7asher ma3lomat zeida fi demea3' el taleb, we low e7taget enak te3raf zeida efta7 ya 3am el kotoob wel net we efham el zeida ely enta me7tagaha, sazeg ana awy fi mawdoo3 el ektera7at da mesh keda ? :) 3amatan ady wegeht nazary fil mawdoo3, we momken akoon 3'altan. 3amatan ya basha kolo beytala3 fil 3'aseel, shed 7elak ya rayes we Insha2 Alah hatofrag, we asef 3ala el comment el teweel el mekalabaz da, kol wa7ed we prestigoh ba2a :) :) :P .
ÐΣĻÞЋΐ-Қ
أولا: منور المدونة ياباشا
ثانيا: هو انت بقى بتاع الأسئلة ... ماشى ... استنانى بره
ثالثا: يابيه انت تطول التعليق براحتك ... ولا يهمك.
رابعا: زى ماقلت فى التدوينة ان المواد المفيدة كتير ولكن لازم نركز على الهدف علشان مانتشتتش فيبقى المفروض انى ماأدرسشى إلا المواد اللى أنا هاأحتاجها فى الرسالة واللى هايحددها الدكتور مش بس زيادة علم وخلاص.
أخيرا: تانى نورت المدونة ومتوقع تكرار الزيارة ان شاء الله.
I agree also that Master is not just a thesis and in some cases in the US the master doesn't have a thesis... just some courses.
By the way, even if u continued to PhD whether in Egypt or even in the US, you will take some courses before the thesis :)
Have fun
غير معرف
أهلا فى المدونة
أنا معاك ان فى أمريكا ساعات بيكون الماجيستير مواد بتتدرس وبس ... وأحيانا كمان بيكون مجرد مشروع كبير فى الكليات العملية ... ولكن فى الحالات دى بيكون معروف ان الهدف من الماجيستير هو دراسة هذه المواد أو الإنتهاء من هذا المشروع ... ولكن فى حالتنا الهدف هو انهاء رسالة الماجيستير ... وزى ماقلت ياجماعة ده هايتطلب دراسة بعض المواد اللازمة للبحث فى موضوع الرسالة ولكن فى الحالة دى هاتكون الدراسة موجههة مش مجرد مواد اضافية وخلاص ... أنا بس عايز أأكد انى مش ضد دراسة مواد علشان الماجيستير ولكن انا ضد دراسة المواد الإضافية دى فقط من أجل الدراسة ... وعلى فكرة ... أنا كنت بأتناقش مع دكتور عندنا فى التمهيدى فى الموضوع ده وعرضت عليه وجهة نظرى وسألته هل ده بيحصل فى أوروبا وأمريكا ... قاللى انه بيحصل فى بعض الجامعات ... ففى أوروبا وأمريكا هانلاقى كل الأنظمة مطبقة ... المهم ان احنا نختار النظام الأمثل لتطبيقه مش نتبعهم وخلاص.
أخيرا ... شرفتنى برأيك وأفدتنى بمناقشتك.
جزاك الله خيرا.
السلام عليكم ياهشام باشا
ايه اخبارك الى لازم تعرفه ان الدراسات العليا فى امريكا والدول المتقدمه الماجستير عبارة عن مواد تتدرس وبس وتطبيق على مشروع يعنى الدراسة هى الاساس لكن هى رسالة ماجستير والكلام الفارغ دا مالوش لزمة يعنى بالعربى الى مالوش قدرة على المذكرة والاطلاع على ما هو جديد فى الكتب لكى يكون عنده اساس لعمل ابداع جديد اذن هو لاصلح للنجاح فى الدراسات العليا نصيحه لاتاخذ مقررات التمهيدى على انا مقررات تتذاكر وتتنسى بعد كدة بدون لازمة لا استفيد منها بعقل المهندس واترك نظام الطلبة القديم وربنا الموفق سلام عليكم
ramy tawfik
وعليكم السلام يا رامى
يابنى انت جبت الكلام ده منين.
أولا: لأ طبعا ... بره -زى ماقلت ردى على التعليق اللى قبلك- الماجيستير ممكن تكون دراسة مواد بس أو دراسة مواد وبعدين تحضير رسالة ... أو مجرد مشروع فقط.
وكمثال على كده ... فى دكتور راح بره علشان يحضر رساله فى الموجات شاف المشرف عليه انه لازم يحضر مواد الماجيستير بتاعة رياضة الأول فراح حضر ورجع للمشرف علشان يكمل الرسالة.
هوه ده اللى أنا قصدى عليه يحصل فى الماجيستير ... تحضر المواد للى هاتفيدك فى تحضير الرسالة بتاعتك ... مش سمك لبن تمر هندى
وبعدين أنا قلت ان أنا فى فى دماغى موضوع للرسالة عايز أحضر فيه علشان يفيدنى فى شغلى مش عايز أستزيد من العلم وخلاص ... فايه هايفيدنى لما آخد ماده ملهاش علاقة خالص بموضوع رسالتى.
وبعدين موضوع الإبداع الجديد ده هو الرسالة اللى بتحل مشكلة قائمة بالفعل أو المشروع وليس التمهيدى فى حد ذاته وكما قلت فإن الدراسة فى الكتب هى الوسيلة لهذا الهدف الإبداعى وليست هى الهدف بحد ذاتها. ولهذا كما قلت يجب ان ندرس المواد التى ستساعدنا على حل المشكلة التى نريد حلها وإلا لماذا لا نجعل التمهيدى ستين بدل سنة أو تلات سنين أو اربعة او خمسة؟؟
طالما المذاكرة هدف فى حد ذاتها؟
وبالمناسبة ... أنا اللى غاظنى أكتر ان ناقشت الموضوع ده مع دكتور عندنا كان بيدرس فى جامعات بره وقاللى ان النظام اللى انا بأقول عليه ده متطبق بره بالفعل فى بعض الجامعات.
جزاك الله خيرا على التعليق
سلام عليكم
إرسال تعليق