أنا خطبت امبارح – آه والله - ... أخيرا بعد حضور المحاضرات وقراءة الكتب والدعبسة فى زخانق الحياة الزوجية ... أخيرا خطبت ... حفلة الخطوبة كانت إمبارح ... وكانت جميلة جدا.
دوشة وزيطة وزمبليطة ... وعيال بتجرى وعيال بتقع على الأرض ... وناس رايحة وناس جاية .. وناس بتبارك وتهنى وناس عمالة تاكل ... دى كانت ليلة.
وكله كوم والدبلة دى كوم تانى ... حاجة كده مش متعود عليها خالص ... لدرجة إنى حسيت لما كنت قايم أنام إنى عايز أقلعها علشان أنام زى ماكنت بأعمل مع الساعة أيام ما كنت بألبس ساعة ... بس بصراحة شكلها حلو فى إيدي.
وتورت مكتوب عليها إسمى وإسم خطيبتى ... وصوت أناشيد إسلامية ملعلع فى المنطقة ... كانت كل حاجة فى المكان بتعلن عن فرحتها.
بس بصراحة ... وأنا رايح الحفلة كنت حاسس إحساس غريب ... لا فرحان ولا زعلان ... لا متضايق ولا مبسوط ... حتى سألت أخويا -بما إنه مجرب قبل كده- إنت كان احساسك إيه وانت رايح حفلة الخطوبة ... قاللى كنت عامل زيك كده برده فاطمنت على نفسى ... ولكن فى أثناء الحفلة بدأ مؤشر السعادة عندى يعلى ... يعنى ... بأتعرف على ناس جديدة -اللى بقوا قرايبى من دلوقتى- وهما برده بيتعرفوا عليا ... وعلى آخر الحفلة كده حسيت إنى فعلا طاير من الفرحة ... خصوصا واحنا بقى بناخد الصور ... أغلب المعازيم روحوا وما فضلش إلا يادوب الأسرتين بس ... وقعدت أتصور مع الناس كلها ... كان هاين عليا أتصور مع الفازات وأطباق الأكل ... ده الموضوع طلع بجد ... خطوبة وعروسة وشبكة ... يانهار ابيض ... ده أنا باين عليا دخلت القفص ... بس لو أعرف مين اللى زقنى؟؟
وبعدين بأه فى الحفلة وبعد الحفلة اتهريت من كلمة عريس دي ... أنا حسيت انى اسمى اتغير من كتر ما سمعتها ... والكلمة دى تنضم للحاجات الكتيرة اللى بأحاول أتعود عليها ... مرة واحدة تحس ان انت كأنك بقيت واحد تانى ... ناس بتهنيك وتقولك ياعريس ... وطبيعى يكون فى عروسة ... وناس تتصل بيك مرة والتانية وقبل الحفلة وبعد الحفلة وفى نص الحفلة.
بس بصراحة مع كل ده –ويمكن علشان كل ده- أنا فعلا فرحان جدا ... بيقولوا إن أيام الخطوبة بتبقى أحلى فترات عمر الإنسان ... مش عارف بس حاسس ان الكلام ده مش هو اللى مفروض يحصل ... المفروض تكون فترة الزواج هى أحسن فترات العمر ... على الأقل أتمنى كده.
يلا ... "طولت عليكوا" :)
عقبال الجميع ان شاء الله.
أخوكم "العريس" ... واحد من المسلمين
هناك ٩ تعليقات:
السلام عليكم ورحمة الله وبركاته
ألف مبروك لك ويتمملك الأمر على خير بإذن الله .
أحلى الأيام هي أيام العقد وقبل الدخلة لأنها أيام تستطيع أن تعبر فيها عن نفسك لزوجتك وتخبرها بكل ما داخل وهي كذلك ومن دون مسؤوليات .
بالطبع أتمنى أن تكون أيام الزواج الفعلي أحلى ولكنها الحياة يا أخي وبارك الله لك على كل حال والسلام ختام
Ahmed Almuslim
وعليكم السلام ورحمة الله وبركاته
الله يبارك فيك وجزاك الله خيرا
فعلا ... المفروض أيام العقد تبقى أيام جميلة جدا وكذلك فترة الخطوبة المفروض برده تبقى جميلة ولكن -ولعلى أحلم فقط- أن تكون معك زوجة تعينك وتعينها على تحقيق أهدافكما .. تسكن اليها إذا ما مرت بك ضائقة ... تعيش معها على راحتك غير متكلف ولا متصنع لشئ ... أعتقد كل ذلك يكون من المعينات على جعل فترة الزواج احلى فترات العمر ... وهناك أشياء كثيرة لا يمكن القيام بها مع زوجتك فى فترة العقد ... كقيام الليل مثلا -أسأل الله ان يعيننا عليه- و العديد من الأمور التى يبسط الله بها الرحمة والود بينكما ... أعلم ان واقع الحياة الآن أصبح صعب للغاية ... ولكنى على يقين بأنه من عاش لله أعطاه الله سعادة الدنيا -فى الزواج والنجاح وماإلى ذلك- وسعادة الآخرة -ألا وهى الجنة أسأل الله أن يجمعنى بزوجتى فيها مع النبى الكريم فى الفردوس الأعلى من دون حساب ولا سابقة عذاب-
أخوك
بارك الله لكما وبارك عليكما وجمع بينكما على خير....
فرحت لكما كثيرا..وعايزه أقولك إن الحياة الزوجيه بتكون أحلى من فترة العقد..وده يتوقف عليكم إنتم وعلى قدر معرفتكم بأمور دينكم وما يتصل به من أمور الزواج ...وعلى قدر عطاءكم إنتم الإثنين هتحسوا بالسعاده..ربنا يبارك لكم.
Ema
جزاكى الله خيرا أختى ... وأرجو من الله ما قلتى.
سلام عليكم
السلام عليكم ورحمة الله,,
مبروك يا أخي.. الله يتمم عليك.
Ghalia
وعليكم السلام ورحمة الله وبركاته
جزاك الله خيرا أختى ... وبارك الله فيكى.
وشرفت بزيارتك للمدونة
أخوكى ... واحد من المسلمين
السلام عليكم
ألف مبروك يا أخى,بارك الله لكما و بارك فيكما و جمع بينكما على خير, و ان شاء الله تكمل بالخطوة الكبيرة قريبا بإذن الله, و لا تنسنا من دعائك أن يمن الله علينا بالزوجة الصالحة, و لكل شباب المسلمين.
مسلم من مصر
وعليكم السلام ورحمة الله وبركاته
الله يبارك فيك يا اخى ... وان شاء الله تجد الزوجة الصالحة قريبا
نورت المدونة
أخوك ... واحد من المسلمين
معلش تعليق متأخر شوية
سبحان الله
على فكرة انا خطبت بعدك بحوالي 3 شهور وكل اللي حصل معاك في حفل الخطوبة حصل معايا بالظبط حتى الدبلة كنت حاسس انها غريبة قوي وأي حد يسلم علي ويضغط على ايدي توجعني لكن دلوقتي بعد 4 شهور وشوية مستحيل اخلعها من ايدي لدرجة اني لو خلعتها شوية احس ان احد اصابعي ناقص هههههههههه
وحكاية ان فترة الخطوبة بتكون احلى فترات العمر كمان تؤرقني جدا الحمد لله انا الآن اشعر بسعادة غامرة انا وخطيبتي والحمد لله خصوصا الحمد لله اننا ملتزمين وهي كمان حافظة للقرآن الكريم كله
لكن احيانا بفكر في حكاية المشاكل اللي بعد الزواج واستغرب ازاي دلوقتي احنا " بنحب بعض أوي " وبعد الزواج ممكن تحصل مشاكل
مش عارف
لكن بصراحة
الواحد قبل الخطوبة ماكانش عايش
واتخيل بعد الزواج ان شاء الله هيكون افضل ادعوا الله
تخيل تناقشت مع خطيبتي في موضوع المشاكل بعد الزواج واتفقنا ان كل شئ يكون بهدوء وبالتفاهم والحوار لأننا ببساطة بشر وببساطة اكتر احنا في الدنيا مش في الجنة
وربنا يبارك علينا وعليك ويرزق اخواننا العزاب ويكملهاعلينا على خير
إرسال تعليق